श्री नवनाथ भक्तिसार · मूळ पोथी
अध्याय १०
गहिनीनाथाचा मातीच्या पुतळ्यापासून जन्म, मधुनाभा ब्राह्मणाकडून संगोपन. १७५ ओव्या · कथासार वाचा
श्रीगणेशाय नमः वक्रतुंड गणाधिपती ॥विद्यार्णवा कळासंपत्ती ॥भक्तवरदा हरिसी आर्ती ॥मंगळमूर्ती गजानना
॥१॥
जयजयाजी आदिनाथा ॥मायाचक्रचालका अनंता ॥सर्वाधीशा भगवंता ॥साक्षात् अक्षय मोक्ष तूं
॥२॥
तरी मागिले अध्यायीं निरुपण ॥श्रीगोरक्षाचा पावोनि जन्म ॥उपरी सेवूनि कनकगिरी ग्राम ॥विद्यार्णवी तो केला
॥३॥
तरी ती विद्या कोण कैसी ॥सकळ कळा श्लोकराशी ॥भविष्योत्तरपुराणासी ॥निरोपितों श्रीश्रोतियां
॥४॥
श्लोक ॥ब्रह्मज्ञान रसायन कविता ॥वेद शास्त्र ज्योतिष तथा ॥व्याकरण धनुर्धर ॥जलतरंगता ॥संगीत काव्य अकरावें
॥५॥
अश्वारोहण कोकशास्त्र निपुण नाट्य तथा चार ॥चतुर्दश विद्यांचा सागर ॥पूर्णपणें भरलासे
॥६॥
टीका ॥प्रथम सांगून ब्रह्मज्ञान ॥स्वमुखीं केल्या परायण ॥विश्व आणि विश्वंभर दोन भावचि ॥ऐसा नुरविला
॥७॥
कीं बहुत जे अर्थप्रकार ॥जीवजंतु चराचर ॥तो ऐक्यमेळीं सकळ विस्तार ॥मीच ऐसें भाविलें
॥८॥
कर्माकर्म सत्कर्मराशी ॥त्या नुरल्याचि कोणीही बीजांकुराशीं ॥वासना देऊनि योगफांसीं ॥कामनेते नुरवितो
॥९॥
ऐशा एकमेळें करुन ॥गोरक्ष झाला सनातन ॥एवंच सकळ ब्रह्मज्ञान ॥उपदोशिलें गुरुनाथें
॥१०॥
मग पूर्णपणाचें पात्र होऊनी ॥वसुधेकल्प अव्यक्त भुवनीं ॥सर्व आत्मरुप माननी ॥तत्स्वरुपीं प्रगटेल
॥११॥
याउपरी वातापित्तकफहारक ॥रसायनविद्या सकळिक ॥किमया करणें धातु अनेक ॥हातवटी सांगितली
॥१२॥
कवित्व रसाळ नवरस ॥गणादि निरोपी दीर्घ र्हकस्व ॥व्यक्त अर्थलिंगप्रकरणास ॥व्यक्ताव्यक्त सांगितलें
॥१३॥
याउपरी वेदाध्ययन ॥सूक्तऋचेंत केला प्रवीण ॥दीर्घर्ह्स्वें छंदें निपुण ॥स्वस्ति छंदीं अवघे गुण पैं केला
॥१४॥
ऋक् अथर्वण यजुर्वेद ॥सामवेदादि सांगूनि प्रसिद्ध ॥उपरि विद्या ज्योतिषसिद्ध ॥परिपूर्ण सांगितली
॥१५॥
सारस्वत किरात कोश ॥कौमुदी रघु हरिवंश ॥पंच काव्यें मीमांस ॥साही शास्त्रें निवेदिलीं
॥१६॥
यावरी धनुर्धरविद्यानिपुण ॥सकळ शस्त्रीं केला प्रवीण ॥तीं सकळ अस्त्रें कोण कोण ॥नामें तयांचीं ऐकिजे
॥१७॥
वातास्त्र आणि जलदास्त्र ॥उभीं उभी कामास्त्र ॥वाताकर्षण बळ स्वतंत्र ॥पर्वतास्त्र सांगितलें
॥१८॥
वज्रास्त्र वासवशक्ति ॥नागास्त्र खगेंद्र संजीवनी ती ॥ब्रह्मास्त्रादि निवारणशक्ती ॥रुद्रास्त्र सांगितलें
॥१९॥
विरक्तास्त्र दानवास्त्र ॥पवनास्त्र आणि कालास्त्र ॥स्तवन महाकार्तिकास्त्र ॥स्पर्शविभक्तास्त्र निवेदिलें
॥२०॥
यावरी साबरीविद्या कवित्व ॥प्रत्यक्ष करुनि सकळ दैवत ॥तयांचा वरदपाणी निश्वित ॥गोरक्षमौळीं मिरवला
॥२१॥
तीं दैवतें कोण कोण ॥बावन्न वीर असती जाण ॥नरक कालिका म्हंमदा उत्तम ॥महिषासुर आराधिला
॥२२॥
झोटिंग वेताळ मारुती ॥अस्त्रवीर मद्रपती ॥मूर्तिमंत सीतापती ॥वरदमौळीं स्पर्शीतसे
॥२३॥
परम जादरीं आलिंगून ॥श्रीराम घेत चुंबन ॥म्हणे होई सनातन ॥कीर्तिध्वज मिरविजे
॥२४॥
यावरी प्रत्यक्ष गजवदन ॥तोहि उतरला सहस्त्रकिरण ॥गोरक्षातें अंकीं घेऊन ॥वरदमौळी स्पर्शीतसे
॥२५॥
यावरी अष्टभैरव उग्र ॥तेही पातले तेथें समग्र ॥सिद्धभैरवादि काळभैरव सांग ॥बाळभैरवादि पातले
॥२६॥
वीरभैरवादि गणभैरव ॥ईश्वरभैरव रुद्रभैरव ॥भस्मभैरवादि महादेव ॥अपर्णापति पातला
॥२७॥
तेणें घेऊनि अंकावरतें ॥मुख कुरवाळिलें वरदहस्तें ॥खेळतां बाबर धांवोनि येती ॥तेही देती आशीर्वचन
॥२८॥
मुंडा चामुंडा शंखिनी डंखिनी ॥कुंड रंडा भालंडा यक्षिणी ॥चंडा वंडिका प्रत्यक्ष येऊनी ॥वर गोरक्षा देती त्या
॥२९॥
यावरी प्रगटूनि जलदैवत ॥तेव्हा त्यातें वर ओपीत ॥कुमारी धनदा नंदा विख्यात ॥देखता त्या गोमट्या
॥३०॥
लक्ष्मी प्राज्ञा बाला बगला ॥नववी दैवत प्रत्यक्ष विमला ॥ऐशा जलदेवता येऊनि तत्काला ॥वर ओपिती बाळातें
॥३१॥
यावरी प्रत्यक्ष अष्टसिद्धी ॥होऊनि वर ओपिती वरमादी ॥आणिमा गरिमा विशाळबुद्धी ॥महिमा प्रकामें पातली
॥३२॥
प्रथिमा प्राची वशित्वा सातवी ॥तेवीं ती सिद्धी महादेवी ॥सज्ज करुनि अस्त्रकार उभवी ॥अष्टसिद्धी तत्काळ त्या
॥३३॥
असो बावन्न वीरांसहित ॥श्रीराम सूर्य जाहला प्राप्त ॥सर्वत्र ओपूनि मौळी हस्त ॥विद्या करीं ओपिती
॥३४॥
असो वर देऊनि सद्विद्येसी ॥सर्वत्र बंदिती मच्छिंद्रासी ॥म्हणती महाराजा गोरक्षासी ॥तपालागीं बैसवीं
॥३५॥
तपीं होआं अनुष्ठान ॥तेणे बळ चढे पूर्ण ॥मग ही विद्या तपोधन ॥लखलखीत मिरवेल
॥३६॥
जैसें खडग शिकले होतां ॥मग भय काय तें शत्रु जिंकितां ॥तेवीं तपोंबळ आराधितां ॥सामर्थ्य सत्ता वाढेल
॥३७॥
ऐसें वदोनि सकळ देव ॥पाहते झाले आपुलाले गांव ॥रामसूर्यादि महादेव ॥बावन्न वीरादि पैं गेले
॥३८॥
यावरी इंद्र वरुण अश्विनी ॥गणगंधर्वादि पातले भुवनीं ॥वर देती तयालागुनी ॥सकळ गेले स्वस्थाना
॥३९॥
याउपरी कोणे एके दिवशीं ॥गोरक्ष घोकितां सद्विद्येसी ॥मंत्रसंजीवनी पाठ मुखासी ॥करीत बैसला होता तो
॥४०॥
जवळी नसतां मच्छिंद्रनाथ ॥बैसला होता एकांतांत ॥तों गांवचीं मुलें खेळत खेळत ॥तया ठायीं पातलीं
॥४१॥
हातीं कवळूनि कर्दमगोळा ॥मुलें खेळती आपुलें मेळां ॥तों गोरक्षापासीं येऊनि आगळा ॥बोल बोलती सकळीक
॥४२॥
म्हणती गोरक्षा ऐक वचन ॥आम्हीं आणिला बहुत कर्दम ॥तरी शकट करुनि दे उत्तम ॥आम्हालागी खेळावया
॥४३॥
येरु म्हणे शकट मजसी ॥करुं येत नाहीं निश्वयेंसी ॥येत असेल तुम्हां कोणासी ॥तरी करुनि कां घ्या ना
॥४४॥
ऐसें ऐकतां मुलांनी वचन ॥करीं कर्दम कवळून ॥आपुलालें करें करुन ॥शकट रचिती चिखलाचा
॥४५॥
कर्दमचक्र काष्ठ व्यक्त ॥शकट केला यथास्थित ॥वरीं उदेलें कल्पनेंत ॥शकटा सारथी असावा
॥४६॥
म्हणूनि कर्दम घेऊनि गोळा ॥मुलें रचिती कर्दमपुतळा ॥परी तो साधेना मुलां सकळां ॥मग गोरक्षातें विनविती
॥४७॥
म्हणती गोरक्षा आम्हांप्रती ॥साह्य देई शकटसारथी ॥आम्हां साधेना कर्दमनीती ॥तरी तूं करुनि देईं कां
॥४८॥
अगा तूं सगळ मुलांचे गणी ॥वयोवृद्ध अससी प्राज्ञी ॥तरी आम्हांसी सारथी करुनी ॥सत्वर देई खेळावया
॥४९॥
ऐसें ऐकतां मुलांचें वचन ॥म्हणे कर्दम आणूनि द्या देतों करुन ॥परी ही वासना भविष्यकारण ॥गोरक्षाते उदेली
॥५०॥
जैसे ज्याचे पूर्वानुक्रम ॥तैसी बुद्धि येत घडून ॥जेवीं बीज पेरिल्या समान ॥तोचि तरु हेलावे
॥५१॥
पहा मातेच्या द्वेषउद्देशी ॥ध्रुव बैसला अढळपदासी ॥तेसेंचि वासनालेशीं ॥क्षीरोदधि उपमन्या
॥५२॥
कीं गांधारींचा होता अंत ॥म्हणूनि पार्था सुचला अर्थ ॥अकिंचन तो वायुसुत ॥ध्वजस्तंभी मिरवला
॥५३॥
कीं सीतासतीच्या उद्देशीं ॥लंकेमी राहिली येऊनि विवशी ॥तिनें भक्षुनि दशाननासी ॥राक्षसकुळ भक्षिलें
॥५४॥
पहा अनुसर्गकर्म कैसें ॥त्याचि राक्षसीं वंशलेशें ॥चिरंजीव होऊनि लंकाधीश ॥भोग भोगी विभीषण
॥५५॥
तस्मात् बोलावयाचें हेंचि कारण ॥बुद्धि संचरे पूर्वकर्माप्रमाण ॥पुढें उदयाते करभंजन ॥येणार होते महाराज
॥५६॥
नवनारायण करभंजन परम ॥उदय पावणार गहन नाम ॥म्हणूनि गोरक्षा इछाद्रुम ॥चित्तधरेतें उदेला
॥५७॥
मग हातीं घेऊनि कर्दमगोळा ॥रचिता झाला उत्तम पुतळा ॥परी रसने पाठ संजीवनी आगळा ॥होत असे मंत्राचा
॥५८॥
त्यांत विष्णुवीर्य उपचार ॥पीपयूमांडणी जल्पत स्मर ॥एवंविधि संजीवनीमंत्र ॥पाठ होता गोरक्षा
॥५९॥
मुखीं पाठ हस्तें पुतळा ॥पूर्णपणीं होतां कर्दमगोळा ॥महाभागीं भाग सबळा ॥व्यक्त असे तत्त्वांचा
॥६०॥
तेणेंकरुनि पंचभूत ॥दृश्यत्व पावले संजीवनीअर्थ ॥करमंजन ते संधींत ॥प्रेरक झाला जीवित्वा
॥६१॥
अस्थिमांस त्वचेसहित ॥अकार दृश्य झाला त्यांत ॥पुढें शब्द आननांत ॥अकस्मात उदेला
॥६२॥
उदय होता करी रुदन ॥तें पाहिलें सकळ बाळांनीं ॥म्हणती भूत आणिलें गोरक्षांनी ॥पळा पळा येथूनियां
॥६३॥
ऐसें बोलतां एकमेकांत ॥सकळ होऊनि भयभीत ॥सांडूनि खेळ सकळ अर्थ ॥पळूनि गेलें वातगती
॥६४॥
हदयीं दाटूनि भयकांपरा ॥मुलें कांपती थरथरां ॥आरडत बरडत मच्छिंद्र आधारा ॥पळोनियां पैं गेलीं
॥६५॥
ऐशापरी मुलें भयग्रस्त ॥तें पाहूनि मच्छिंद्रनाथ ॥मग पाचारुनि सकळ मुलातें ॥आश्वासूनि पुसतसे
॥६६॥
म्हणे बाळां होय थरथराट ॥का रे कांपतां सांगा वाट ॥येरी मुळाहूनि सकळ बोभाट ॥मच्छिंद्रातें निवेदिला
॥६७॥
म्हणे कर्दमाचा शकटसारथी ॥करवीत होतों गोरक्षाहातीं ॥तों बालतत्त्वपणीं भूतमती ॥कर्दम लोपूनि संचरली
॥६८॥
तें भूत अद्यापि आहे लहान ॥परी क्षणैक होईल स्थूळवटपण ॥आम्हांलागी करील भक्षण ॥म्हणूनियां पळालों
॥६९॥
परी आम्ही आलों येथें पळून ॥मागूनि गोरक्षनाथ येत होता धांवून ॥त्यासी भक्षिलें असेल भूतानें ॥यांत संशय नसेचि
॥७०॥
मच्छिंद्र ऐसी ऐकूनि वार्ता ॥साशंकित झाला चित्ता ॥चित्तीं म्हणे मुलें वार्ता ॥सांगती काय तें नोहे
॥७१॥
अवचट भूत कैसें व्यापिलें ॥तें पाहूनि बाळ भ्यालें ॥तरी आतां जाऊनि नहिलें ॥गोचर करावे निजदृष्टीं
॥७२॥
मग आश्वासूनि सकळ मुलां ॥निकट बैसवूनि पुसे त्यांला ॥कोणत्या ठायीं संचार झाला ॥भूताचा तो मज सांग
॥७३॥
येरी म्हणती बावा ऐक ॥भूत तेव्हां होतें बाळक ॥आतां थोर फोडोनि हांक ॥भक्षील आम्हां वाटतस्से
॥७४॥
मच्छिंद्र म्हणे मी असतां ॥तुम्हां भय नसे सर्वथा ॥चला जाऊं भूतासीं आतां ॥शिक्षा करुं आगळी
॥७५॥
मुले म्हणती मच्छिंद्रनाथ ॥तुम्ही जाऊं नका तेथ ॥बालर्ककिरण आहे भूत ॥तुम्हां भक्षील तेचि घडी
॥७६॥
मच्छिंद्र म्हणे दुरुन ॥दाखवा भूताचा ठिकाण ॥मग तीं बाळें अवश्य म्हणोन ॥दुरुनी ठाव दाविती
॥७७॥
यापरी इकडे गोरक्षनाथ ॥तोही पळाला होऊनि भयग्रस्त ॥मुलाचें मंडळ सांडूनि एकांतीं ॥लपोनियां बैसला
॥७८॥
भूत भूत ऐसें म्हणून ॥मुलें पळालीं आरोळ्या देऊन ॥तेव्हांचि गेला होता पळून ॥भूतभयेंकरोनियां
॥७९॥
ठाव लक्षूनि परम एकांत ॥बैसला होता शुचिष्मंत ॥परी हदय धडधडीत अत्यंत ॥भूत येईल म्हणोनियां
॥८०॥
येरीकडे मच्छिंद्राते ॥ठाव दाविती मुलें समस्त ॥परी दूरचि असती यत्किंचित ॥सन्निध न येत भयानें
॥८१॥
जैसा राजभयाचा तरणी ॥लखलखीत मिरवत असतां अवनीं ॥मग दुष्कृत चोर जार जारणी ॥दर्शनार्थ ते न येती
॥८२॥
कीं रामनामबोधोत्तर ॥असतां भूत न ये समोर ॥कीं पीयूषीं विपदृष्टिव्यवहार ॥कदाकाळीं चालेना
॥८३॥
तन्न्यायें मुलें भिऊन ॥दुरुनि दाविती मच्छिंद्रा ठिकाण ॥म्हणती याचि ग्रामांतून ॥भूत प्रगट जाहलें
॥८४॥
मग त्या ग्रामांत मच्छिंद्रनाथ ॥मुलें दावितां सधट जात ॥तों बाळ टाहा आरडत ॥महीलागीं उकिरडा
॥८५॥
बालार्ककिरणी तेज लकाकत ॥मुखीं टाहा टाहा वदत ॥तें पाहूनि मच्छिंद्रनाथें ॥करभंजन ओळखिला
॥८६॥
हदयीं धरुनि लबडसवडी ॥बाळ उचलोनि घेतला आवडीं ॥मग लगवगी गांवाबाहेर अतितांतडीं ॥बाळासह पावला
॥८७॥
तें सकळ मुलें पाहूनी ॥पळतीं झालीं प्राण घेऊनि ॥म्हणे नाथांनी भूत धरोनी ॥आणिलें आतां बरें नसे
॥८८॥
आतां त्या भूतासी देईल सोडून ॥मग तें आपल्या पाठीसी लागून ॥एकएकासी भक्षील धरुन ॥ऐसें म्हणून पळताती
॥८९॥
पळता पडती उठूनि जाती ॥भयेंकरुनि सांदींत दडती ॥हदयीं धडधडा अर्थार्थ चित्तीं ॥लपोनियां बैसला
॥९०॥
येरीकडे बाळ घेऊन ॥गोरक्षा पाहे मच्छिंद्रनंदन ॥सदनीं सदनीं हांका मारुन ॥गोरक्षातें पुकारी
॥९१॥
परीं ज्या सदनी जाय जती ॥ते सदनींचीं मुलें आरडूनि उठती ॥आई आई बया बया म्हणती ॥आणिक पळती पुढारां
॥९२॥
परी सदनींसदनींचे जन ॥नाथा पुसती हाटकून ॥भय काय दाविलें मुलांकारण ॥म्हणूनि आरडूनि पळताती
॥९३॥
कोणाचें मूल घेवोनि ॥फिरतां तुम्ही सदनी सदनी ॥येरी म्हणे गोरक्ष नयनी ॥पाहेन तेव्हां सांगेन
॥९४॥
ऐसें बोलूनि पुढें जात ॥तों पातला गोरक्ष होता जेथ ॥उभा राहोनि अंगणांत ॥गोरक्षातें पाचारी
॥९५॥
ऐकूनि श्रीगुरुची वाणी ॥गोरक्ष निघाला सदनांतुनी ॥परी येतांचि बाळ पाहिला नयनी ॥पुन्हां आरडूनि पळे तो
॥९६॥
हा विषर्यास पाहुनि नयनीं ॥मच्छिंद्र विचारी आपुले मनीं ॥गोरक्ष व्यापला भयेकरुनी ॥बाळ येथें ठेवावें
॥९७॥
मग स्वगिरींचे काढूनि वसन ॥त्यावरी निजविलें बाळरत्न ॥मग त्या सदनीं संचरुन ॥गोरक्षापासीं पातला
॥९८॥
जातां कवळूनि धरिले हदयीं ॥म्हणे वाहसी व्यर्थ भयप्रवाहीं ॥तें भूत नाहें मनुष्यदेहीं ॥करभंजन उदेला
॥९९॥
परी तयाची उदयराहाटी ॥सांग जाहली निर्भय पोटीं ॥येरी म्हणे मुलांसाठी ॥खेळत होतो महाराजा
॥१००॥
हाति घेऊनि कर्दमगोळा ॥पूर्णपणीं रचिला पुतळा ॥परी नेणों कैशी झाली कळा ॥भूत त्यांत संचरलें
॥१०१॥
लोपूनि सकळ कर्दमनीती ॥दिसूं आलीं मानवाकृती ॥तेणें भय व्यापूनि चित्तीं ॥पळालों मी मुलांसह
॥१०२॥
यावरी मच्छिंद्र बोले वाणी ॥तूतें सांगितली संजीवनी ॥तो मंत्र घोकितां क्षणीं ॥करीत होतासी काय तूं
॥१०३॥
येरी म्हणे आज्ञा तुमची ॥भंगिली नाहीं शपथ पायांची ॥खेळतां वाणीं मंत्राची ॥सांडिलीं नाहीं महाराजा
॥१०४॥
कर्दमपुतळा करितां हातीं ॥परी मंत्र सांडिला नाहीं उक्तीं ॥चुकलों नाहीं शिक्षेहाती ॥ओपू नका गुरुनाथा
॥१०५॥
ऐसी ऐकतां गोरक्षवाणी ॥मच्छिंद्र तोषला आपुले मनीं ॥म्हणे बा बरी केली करणीं ॥ऊठ आतां वेगेंसी
॥१०६॥
मुख कवळूनि चुंबन घेत ॥हास्य मानूनि कुरवाळीत ॥म्हणे होई आतां स्वस्थ ॥चाल वेगीं पाडसा
॥१०७॥
येरी म्हणे गुरुनाथा ॥तुम्हीं आणिलें आहे भूता ॥तें मज खाईल प्रांजळ आतां ॥बाहेर नेऊं नका जी
॥१०८॥
मच्छिंद्र म्हणे ऐक मात ॥हें बाळ नसे रे भूत ॥तुवा घोकोनि संजीवनीत ॥मनुष्यपुतळा तो झाला
॥१०९॥
जैसा गौरउकिरडां स्थान ॥बाळ झालासी उत्पन्न ॥त्याच नीती खेळतां कर्दम ॥बाळ उदयातें आलें हो
॥११०॥
ऐसी ऐकतां गुरुगोष्टी ॥म्हणे भूत नोहे तपीजेठी ॥मच्छिंद्र म्हणे भय पोटीं ॥सांडीं मनुष्य तें असे
॥१११॥
ऐसें ऐकूनि प्रांजळ मत ॥मग श्रीगुरुचा धरुनि हात ॥बाळ होतें चीरपदरांत ॥तयापासी पातले
॥११२॥
बाळ उचलोनि मछिंद्रनाथ ॥आपल्या शिबिरा घेऊनियां जात ॥गोदुग्ध आणूनि पान त्वरित ॥ते बाळका पैं केलें
॥११३॥
यावरी वसनझोंळी करुन ॥आंत घातला गहिनीनंदन ॥यावरी तया गावींचें जन ॥शिबिरापाशीं पातले
॥११४॥
नाथचरणीं अर्पूनी माथा ॥पुसती हे नाथ समर्था ॥बाळ कोणाचें हालवितां ॥श्रवण करु इच्छितो
॥११५॥
मग झाला वृत्तांत मच्छिंद्रनाथ ॥तयां ग्रामस्थां निवेदित ॥तो ऐकूनि सकळ वृत्तांत ॥आश्चर्य करिती क्षणोक्षणीं
॥११६॥
म्हणे धन्य धन्य संजीवनी ॥हा कलींत उदेला उशनामुनी ॥परी त्याही प्रत्यक्ष सर्वगुणी ॥नाथ मच्छिंद्र वाटतो
॥११७॥
पहा पहा हा गुरुदैत्य ॥शवशरीरा सावध करीत ॥परी त्या म्हणाया जडदेहस्थ ॥जीवदशा व्यापीतसे
॥११८॥
तरी तैसा नोहे मच्छिंद्रनाथ ॥कदंमपुतळा केला जिवंत ॥तस्मात् शुक्र तो त्या तुलनेंत ॥सहस्त्रभागी दिसेना
॥११९॥
तरी उशना न म्हणूं संमती ॥द्वितीय ब्रह्मा पातला क्षितीं ॥तीही संमत गौण चित्तीं ॥मच्छिंद्रभाग्य दिसतसे
॥१२०॥
पहा पहा विधिराज ॥उत्पन्न करी जगा सहज ॥तरी मूळ त्यांत असे बीज ॥बीजासमान रुख होय
॥१२१॥
यावरी आणिक दुसरा अर्थ ॥विधी स्वअंगें उत्पत्ति करीत ॥तैसा नोहे मच्छिंद्रनाथ ॥शिष्याहाती करविला
॥१२२॥
महाबीजावीण जाण ॥कर्दमी केला मनुष्य उत्पन्न ॥तस्मात् धन्य विधीहून ॥मच्छिंद्रनाथ मिरविला
॥१२३॥
ऐसें परस्परें भाषण ॥करिती गांवींचे सकळ जन ॥यावरी बोलती नाथाकारण ॥नाथानिकट बैसूनियां
॥१२४॥
म्हणती महाराजा प्रतापतरणी ॥बाळाचे कष्ट करुं जाणे जननी ॥ती तों बाळका न दिसे करणी ॥गैवीनंदन हा असे
॥१२५॥
पहा बाळाचे कष्ट उत्कृष्ट ॥पुरुषा होईनात ते नाथा श्रेष्ठ ॥तरी यासी धर्मजननी वरिष्ठ ॥करुनि द्यावी महाराजा
॥१२६॥
तीतें बाळक करीं अर्पण ॥करील तयाचें संगोपन ॥तुम्हांलागीं कष्ट दारुण ॥होणार नाहीत महाराजा
॥१२७॥
ऐशी ऐकतां जगाची वाणी ॥मान तुकावी मच्छिंद्रमुनि ॥म्हणे बा ते धर्मजननी ॥कोणती करावी महाराजा
॥१२८॥
ऐसें बोलतां मच्छिंद्रनाथ ॥विचार करिताती ग्रामस्थ ॥तों ग्रामामाजी विप्रगृहांत ॥मधुनामा नांदतसे
॥१२९॥
तयाची कांता लावण्यखाणी ॥पतिव्रता धर्मपत्नी ॥सत्य संचित सर्वज्ञानी ॥ज्ञानकळा पै असे
॥१३०॥
नामें कौतुका असे गंगा ॥निर्मळपणीं असे अभंगा ॥पतिसेवे अंतरंगा ॥जगामाजी मिरवली
॥१३१॥
उदरीं नाहीं संतति ॥तेणें विव्हळ प्रेम चित्तीं ॥संततीविण कामगती ॥संसार ते वेदना
॥१३२॥
सदा वाटे हुरहुर ॥लोकांचे पाहूनि किशोर ॥चिंत्ती पाहूनि चिंत्ती गहिर ॥साशंकित होताती
॥१३३॥
नाना यत्न संततीसाठीं ॥करुनि बैसले होते जेठी ॥उपाय न चाले परम कष्टी ॥जगामाजी मिरविला
॥१३४॥
ऐसे असतां उभय जन ॥तों दैवें उदेला ॥मांदुसाकारण ॥ग्रामस्थांकरीं तयाचें स्मरण ॥अकस्मात पैं झालें
॥१३५॥
जैसा द्रोणाचा विषमकाळ ॥निवटावया उदेला उत्तम वेळ ॥सहजखेळीं गांधारी बाळ ॥विटी कूपांत पडियेली
॥१३६॥
कीं रत्नांची होणें उत्पत्ती ॥म्हणोनि देवदानवमती ॥अब्धिमंथनी उदेली चित्तीं ॥एकभावेंकरुनियां
॥१३७॥
तन्न्यायें मधुविप्राचें ॥दैव उदेलें जगमुखें साचें ॥म्हणूनि स्मरण निघालें त्याचें ॥मान्य पडलें सर्वांसी
॥१३८॥
मग मच्छिंद्रनाथा विनवणी करुन ॥म्हणती महाराजा मधुब्राह्मण ॥तयाची कांता परम सगुण ॥ज्ञानकळा असे कीं
॥१३९॥
तो वोपूनि बाळ गोमट ॥तेथेचि होईल पूर्ण शेवट ॥पुत्रार्थिया परम अनिष्ट ॥दिवस असती महाराजा
॥१४०॥
ऐसी ऐकूनि मच्छिंद्रबाणी ॥लावण्यराशी ॥सदगुणवर्या जगासी ॥नाथ पाहतांच ते चित्तासी ॥ओळखिलें हदयांत
॥१४२॥
मनांत म्हणे मच्छिंद्रनाथ ॥उत्तम जागीं दिसून येत ॥सकळ जग मान देत ॥तस्मात् श्रेष्ठ आतां हे
॥१४३॥
जो जगामाजी आहे भला ॥तो तैसाचि परलोकां ठेला ॥जो जगीं जाय मानवला ॥परलोकीं मानवला तोचि एक
॥१४४॥
आणिक भविष्य अवश्य जाण ॥अर्थाअर्थी करी गमन ॥मग कौतुकात्रें जवळ घेऊन ॥बाळ ओटी ओपीतसे
॥१४५॥
म्हणे माय वो माय ऐक ॥हा बाळ आहे वरदायक ॥नवनारायणांतील एक ॥करभंजन मिरवला
॥१४६॥
याचें होता संगोपन ॥फेडील दृष्टीचें पारण ॥जगामाजी स्थूलवट मान ॥पुत्र तुझा मिरवेल हा
॥१४७॥
म्हणसील हा होईल कैसा ॥तरी कीर्तिध्वज मित्र जैसा ॥कीं देवकीचा हरि जैसा ॥वंद्य असे जगातें
॥१४८॥
माय मी काय सांगू गहन ॥या बाळाचें चांगुलपण ॥मूर्तिमंत याचे सेवेकारण ॥कैलासपती उतरेल गे
॥१४९॥
तयाची निवटूनी अज्ञानराशी ॥हा अनुग्रह होईल तयासी ॥आणूनि ठेवील निवृत्तिपदासीं ॥निवृत्तिनामें मिरवुनी
॥१५०॥
म्हणे हा अयोनि संभवला ॥जगामाजी सहज गे मिरवला ॥परी अति शहनीं नाम याला ॥गहनी ऐसें देई कां
॥१५१॥
यावरी आणिक सांगतों तुजसी ॥आम्ही जातों तीर्थस्नानासी ॥उपरी फिरुनि द्वादशवर्षी ॥गोरक्षबाळ येईल गे
॥१५२॥
तो यातें अनुग्रह देऊन ॥माय गे करील सनातन ॥परी तूं आता जीवित्व लावून ॥संगोपनें करी याचे
॥१५३॥
यावरी बोले कौतुकें सती ॥कीं महाराजा योगमूर्ती ॥बाळ ओपिलें माझे हातीं ॥परी संशय एक असे
॥१५४॥
तुम्ही द्वादश वरुषां आला परतोन ॥बाळ न्याल कीं मजपासून ॥मग कैसें जननीपण ॥जगामाजी मिरवावें
॥१५५॥
मग केल्या कष्टाचें आचरण ॥मज मिरवेल कीं भाडायितपण ॥तरी प्रांजळपणीं आतांचि वचन ॥मजप्रती सांगिजे
॥१५६॥
पहा पहा जी आशाबद्ध ॥सकळ जग असे प्रसिद्ध ॥तरी इच्छा प्रांजळ शुद्धबुद्ध ॥एकभागीं लावा जी
॥१५७॥
तुम्हां आशा असेल याची ॥तरी तैशीच गोष्टी सांगायाची ॥मग नाथ गोष्टी ऐकूनि तिची ॥प्रांजळ वजन बोलतसे
॥१५८॥
माये संशय सांडूनि मनीं ॥बाळ न्यावें आपुलें सदनीं ॥माझी आशा बाळालागुनी ॥गुंतत नाहीं जननीये
॥१५९॥
तरी तुज तुझा लाभो सुत ॥प्रांजळपणीं मिरवो जगांत ॥तूं माय हा सुत ॥लोकांमाजी बोलतील
॥१६०॥
मी आणि माझा शिष्य ॥गुंतणार नाही या आशेस ॥हा बाळ तुमचा तुम्हांस ॥लखलखीत बोलतों
॥१६१॥
परी गोरक्ष अनुग्रह देईल यासी ॥पुढें जाईल तीर्थस्नानांसी ॥तूं सांभाळ तुजपाशीं ॥चिरंजीव असो हा
॥१६२॥
ऐसें बोलूनि ग्रामस्थांतें ॥शपथपूर्वक साक्षसहित ॥निर्मळपणीं करुनि चित्त ॥कौतुकसदनीं बोलवी
॥१६३॥
मंत्रें चर्चूनि विभूति माळा ॥मोहनास्त्र घातलें गळां ॥कौतुकें स्पर्शीत हदयकमळा ॥पयोधरीं पय दाटतसे
॥१६४॥
मग तें बाळ लावोनि स्तनीं ॥गांवींच्या आणूनि सुवासिनी ॥पालखांत घातलें प्रेमेंकरुनी ॥गहनी नाम स्थापिलें
॥१६५॥
यावरी मच्छिंद्र कांहीं दिवस ॥तया ग्रामीं करुनि वास ॥मग सवें घेऊनि गोरक्षास ॥तीर्थस्नाना ॥चालिला
॥१६६॥
पुसूनि सकळ ग्रामस्थांसी ॥निघता झाला गौरवेंसी ॥मार्ग लक्षूनि तीर्थस्नानासी ॥बद्रिकाश्रमीं जातसे
॥१६७॥
परी मार्गी चालतां वाटोवाट ॥श्रीगोरक्षाची घेऊनि पाठ ॥कार्यरुपी कार्य घेऊनि अलोट ॥परीक्षेतें पाहतसें
॥१६८॥
नंतरी ते पाहतां परी विषम अशी ॥विषम दिसती सर्व कार्यासी ॥मग मच्छिंद्र विचार करी मानसीं ॥तप पूर्ण नसे या
॥१६९॥
मुळींच पदरी पैसा नसतां ॥कीं दान मिरवी दांभिका व्ययसा ॥तेवीं मंत्रहेतु तपोलेशा ॥विना विषम आहे हा
॥१७०॥
तरी आतां बदरिकाश्रमीं ॥बद्रीकेदार उभा स्वामी ॥तया हातीं गोरक्ष ओपूनी ॥तयालागीं रुझवावा
॥१७१॥
ऐसा विचार करुनि चित्तीं ॥उभयतां हिंडलें नाना तीर्थी ॥मग लक्षूनि हिमाचलमार्गाप्रती ॥बदिकाश्रमाप्रती पैं गेलें
॥१७२॥
गेले परी तेथील कथन ॥पुढिले अध्यायीं होईल श्रवण ॥अर्थ धरुनि अपूर्ण ॥स्वीकार करावा श्रोत्यांनीं
॥१७३॥
तुम्ही विचक्षण श्रोते संत ॥सदा तुमचा धुंडीसुत ॥सेवेलागीं अर्थी प्राणांत ॥ग्रंथ आदरीं मिरवितसे
॥१७४॥
तुमचे कृपेचें लेवूनि भूषण ॥नरहरिवंश पूर्ण ॥कवि मालू धुंडीनंदन ॥संतगणीं मिरवला
॥१७५॥
स्वस्ति श्रीभक्तिकथासार ॥संमत गोरक्षकाव्य किमयागार ॥सदा परिसोत भाविक चतुर ॥दशामाध्याय गोड हा
॥१७६॥
श्रीकृष्णार्पणमस्तु ॥ ॥ नवनाथभक्तिसार दशमाध्याय समाप्त ॥